Var ein tur ut i Gjerdsvika i påska, og då måtte eg slenge meg med Inge ut ein tur. Det hadde vore mykje å sett på loddet, men lite å få siste tida. Inge trudde det var Hyse han såg, så vi bestemte oss for å fiske med agn i håp om å lure hysa på det.

Vi starta ute ved Klovholmane der Inge hadde sett mykje oppe på 30m dagen før, men her var det tomt i dag. Fann noko nede på 60m, men det tok ikkje. Seig nordover imot Hidsbåden der vi prøvde på noko nede på vel 60m. Her fikk vi eit par greie hyser. Vi dreiv innover imot Gjerdsvika og fiska oss heile veien. Nordavinden friska etter kvart på og det vart surt, men hysa fortsatte å bite så vi holdt ut. Til slutt kom vi utav det og vi var ganske kalde i den friske nordavinden, så vi køyrde oss inn i meda hass Holassen, men der var det tomt.

Inge hadde tidlegare i veka sett ein lopp utunder Gjøskjæret som han trudde kanskje var sild, så vi seig ut der for å sjå om den var der enno og om der kunne stå noko fisk under den, men loppen var vekk og det var ikkje noko som beit. Så vi sula opp og gikk inn igjen med 7-8 småhyser som vart middag dagen etter.

Helga etter påske dukke plutsleg Henning Urke og gjengen hans opp i Eidselva for å merke sjøaure. Derfor vart det innover for å hjelpe til med å prøve å få tak i 25-30 sjøaurar til dei. Normalt burde det gå greit å få tak i såpass med intensivt fiske over ei helg. Normalt står det ein del i osen å beitar eller avlusar seg, på Nor er det ofte ein god del som begynner å forberede utgangen ifrå vatnet.

Inge og Endre hadde starta fisket på fredag med å få eit par litt større framme på Nor, mens eg måtte være på turnstemne i Ulsteinvik. I tillegg til aurane fikk dei nokre laksar, blant anna ein som hadde vore godt over 10kg i sine glansdagar.

Køyrde innover etter lunsj og fant karane i Kastehølen. I dag hadde dei ikkje fått ein einaste sjøaure, men dei hadde fått nokre stølaks. Eg fikk låne stanga på vei opp igjen til bilene og på andre kastet så hang det på ein laks som raskt vart kroka av og slept fri igjen.

Vi flytta så ned på Malakoff der eg raskt kroka ein laks langt framme. Fiska oss ned til steingapahuken før vi snudde opp igjen. På vei opp igjen kroka eg ein til laks midt på strekket.

Vi var så ned i osen, fram på Nor og ved Skipenesbrua, men det var kun laks å få. Inge fikk ein til stor laks på Nor, men aure vart det ikkje.

Dagen etter var eg seint ute og karane hadde fiska både her og der, men det var ingen aure å finne. Etter å ha fulgt dei rundt eit par timar å fiska både her og der så måtte eg pakke sammen og køyre heim, mens dei fortsatte litt til. Endre greidde til slutt å få ein mindre aure i osen, men det vart med 4 aurar total, der eine var usikker fordi den var ganske slank. Det har sett ille ut med sjøauren siste åra, men no er det heilt krise.

Sia været var labert og ingen andre av gjengen hadde kort på åpninga, så var det opningsmiddag med berre Inge og meg, så då gikk vi for det enkle med hamburger. Etter det gjorde eg det meste klart og kraup til køys for å prøve å sove litt før fiskestart. Hadde ikkje store trua på at eg skulle sove lenge, men vakna av alarmen kl.23. Dermed vart det litt stress for å rekke ned til kl.00, men det gikk akkurat og eg kom ut av skogen når Vebjørn var klar til å gå ut å starte. Mens eg installerte meg i bua så gikk Vebjørn over, men han kjende ikkje noko.

Så var det min tur til å starte sesongen. Midt i hølen var det noko som plukka, men slapp bukta og letta utan å kjenne noko meir. Kjendast ut som ei Honndalskrede, noko Vebjørn fant ut på neste overfar då han fikk den, samt at han var bortpå ei til.

På neste overfar så fikk eg den andre han hadde vore borti, men heldigvis så datt ho av før eg fikk halt inn. Vi holdt på til det var lyst, annankvar runde over Moahølen. Når Vebjørn hadde fått første overfaret i godt lys så pakka han saman og gikk for å kvile litt, mens eg leita opp makken for å sjå om laksen var meir bitevillig på den.

Fiska ganske grundig over og litt bakom midten så kom dei kjende laksehugga. Eg lot være å slå til for at sirkelkroken skulle få feste seg godt i munnviken. Til slutt letta eg stanga. Det nappa mens eg letta, men det var ingen motstand i det heile. Kva i alle dagar var dette? Til slutt slapp det og det var ikkje noko i enden. Sveiva inn og sjekka makken, og denne var akkurat like heil og fin som før. Dette kunne ikkje stemme om fisken hadde tygd på den i 10 sekund?? Og etterkvart voks det fram ei mogleg forklaring. Truleg har blyet hengt på andre sida av laksen slik at den har laga nappinga, mens makken aldri var innom laksekjeften. Så når eg letta stanga så drog eg berre blyet over ryggen på fisken, derav nappinga utan motstand.

Fiska over Moahølen 2-3 gangar til utover morgonen, men med unntak av ei Honndalskrede på land så var det ikkje noko å kjenne.

Når klokka var kvart over 5 så gikk eg fram for å fiske øverste hølen. Der stod det 2 mann på andre sida å fiska, men eine gav seg og han andre var komen så langt ned at eg gikk bort og fiska fremre del. Etter nokre få kast så var andremann ferdig også og karane begynte å pakke sammen og gikk.

Eg flytta meg ned til bakre del og fiska renna ut av hølen. Med ein gang var det fisk bortpå og plukka, men dei vart ikkje faste. Prøvde igjen eit par kast og det fortsatte å nappe, men tok ikkje godt nok til at sirkelkroken fant munnviken. Kasta til slutt langt bort og lot makken drive ned imot steinen. Her plukka det meir intens enn nokon gong og eg prøvde lette stanga. Det var god motstand og eg tenkte at der satt den. Fisken kom oppi overflata og rulla så eg konkluderte med at det var ein aure, men så berre slapp den. Det var tydeleg at kroken ikkje hadde funne munnviken. Sveiva inn og såg at kroken var retta ut ein god del, så det var nok det som gjorde at den vart litt fast, men ikkje heilt fast. Eg orka ikkje å knyte opp igjen, men pakka sammen og køyrde fram igjen for å sove nokre timar.

Starta andre økt kl.11:30 med å fiske fremste hølen sia der ikkje var folk å fiska på andre sida. Var fortsatt nokre aurar som plukka bak i renna ned imot skiltet, men sia det ikkje likna på laks så gjekk eg derifrå.

Såg Inge hadde gitt seg på Bjørlo og for glidande framover vegen for å prøve den store lykka på Nor. Det hadde vore heilt fritt på Bjørlo, einaste han hadde sett var 2 fiskar som var oppe bakpå Kastehølen kl.23 mens han sat å venta på startsignalet.

Eg prøvde så i Moahølen igjen, men det var heilt dødt med unntak av eit par Honndalskreder som plukka. Venta litt og gikk over ein gang til, men med same resultatet. Gikk så nedover og fiska på neset med prydbuska som no visst var død. Fiska meg så vidare nedover når Endre kom for å fiske Flata ifrå Kvien. Eg kjende ikkje noko, og det gjorde heller ikkje Endre som raskt gjorde seg ferdig. Eg fiska meg nedover til Flata. I det eg var komen ned til godplassen så var eg berre sikker på at her var det fisk. Plutseleg drog det kraftig i snøret, stanga gikk heilt ned i horisontal og sena rasa av snella, her var det fisk ja. Eg var sikker på at den hadde tatt makken skikkeleg så eg letta stanga for å kroke fisken. Det rasa fortsatt av snella og det var skikkeleg motstand i det fisken rulla seg i overflata. Kjente sirkelkroken gli ut mellom tennene på den store sjøauren og vekk var den, heldigvis. Med vanleg krok hadde denne vore fast og gjerne langt bak sia den tok så kraftig, men no fikk den berre ein kjipp og har forhåpentlegvis lært å ikkje bite på meir vegn i år.

Ringde Endre som kunne fortelle at han hadde hatt eit skikkeleg drag i fluga i Hammarhølen på første overfaret, men etter det hadde det vore heilt dødt. Eg gikk fram igjen og fiska Moahølen ein siste gang uten at det hjalp noko.

Opningsdøgnet vart ein stor skuffelse med berre 5 innmeldte laksar. 1 på Stokkenes, 1 på Alsaker, 2 på Bjørlo og 1 på Hjelle. Sjekka åra sia 2010 og dette var det dårlegaste, sjølv om der var år med både 6 og 7 fiskar. Men det som var enno meir uroande var at det var same over heile fjøla med ein elendig start i heile Sørnorge.